SEMINAR NASIONAL GIA — January 18, 2017

SEMINAR NASIONAL GIA

Versão para impressão

DILI, CFJ – S.E. Ministru Justisa Ivo Valente nu’udar oradór ida ba Semináriu Nasionál kona-ba fortalesimentu integridade no promosaun boa governasaun atravez hosi edukasaun, prevensaun no kombate má-administrasaun no korrupsaun iha Centro Formação Jurídica (CFJ) iha Dili, Kuarta-Feira (17/02).

Semináriu Nasionál loron-rua ne’e (17-18/02) abertura hosi S.E. Ministru Estadu, Koordenadór asuntu Administrasaun no Justisa, no Ministru Administrasaun Estatál Dionísio Babo Soares, P.hD. partisipa hosi direjente ofisiais nível nasionál no munisípiu sira ámbitu Ministériu Justisa.

Oradór sira aliénde Ministru Justisa rasik, oradór prinsipál sira seluk mai hosi váriu instituisaun Estadu mak hanesan; Prokuradór-Jerál Repúblika Dr. José da Costa Ximenes, Juíz Administradór Tribunál Distrital Dili Dr. Duarte Tilman, Komisária Komisaun Funsaun Públika (KFP) Dra. Olandina Caero, Komisáriu Komisaun Anti Korrupsaun (KAK) Dr. Adérito António Pinto Tilman, Provedór (PDHJ) Dr. Silveiro Baptista Pinto, Inspetór-Jerál Estadu Dr. Francisco de Carvalho, Defensór-Públiku Jerál Dr. Sergio de Jesus Hornai no Diretór-Jerál Ministériu Justisa Dr. Henrique de Oliveira Ximenes.

Ministru Ivo lori materia ho tópiku aprezentasaun, “Estratégia política para forteleser a integridade e promover a boa governação e transparência na administração pública no Ministério da Justiça.”

Molok hahú ninia aprezentasaun, Ministru Justisa hato’o nia agradesimentu ba oradór no partisipante sira-hotu ne’ebé foti prezensa iha semináriu importante ida ne’e.

“Ministériu Justisa halibur naí-ulún sira hosi orgaun Estadu sira atu transmite sira-nia koñesimentu no prátika di’ak sira relasiona ho prevensaun Má Administrasaun no Promove Governasaun Di’ak ba Diretór-Jerál, Diretór Nasionál, Diretór Munisípiu, Chefe Departamentu sira no ofisiais finansa sira iha ámbitu Ministériu Justisa nian,” hateten Ministru Ivo.

Ministru Ivo subliña tán katak, “ho semináriu ida ne’e atu aumenta liután koñesimentu funsionáriu nian, ho objetivu atu hadia kualidade servisu no eleva prestasaun servisu iha administrasaun públika liu hosi implementasaun karaterístika prinsipais hosi governasaun di’ak ne’ebé responsivu, tuir lei, efisiénte no efikáz, transparante no akuntável.”

Iha ninia aprezentasaun, Ministru Justisa koalia kona-ba “oinsá” administrasaun públiku tenke la’o tuir prinsípiu legalidade no transparénsia, boa governasaun ho ninia karaterístika iha prátika servisu loron-loron nian no “oinsá” melhora attitude, no mós aplikasaun sansaun no punisões sira.

“Hanesan instituisaun administrativa justisa nian, dezenvolvimentu rekursu umanus iha área kontrollu internu importante tebes, presiza tebes atu kontinua halo formasaun ba direjente nasionál no munisípiu sira, inklui “oinsá” luta hasoru prátika illegal no korrupsaun iha servisu administrasaun direta no servisu organizmu autonómia téknika tutelada iha Ministériu Justisa,” hateten Ministru Justisa.

Semináriu loron-rua ne’e organiza hosi Gabinete Inspesaun no Auditoria (GIA) Ministériu Justisa, no prosesu semináriu modera hosi Assessor Gabinete Ministru Justisa Joaozito Viana no Diretór Nasionál DNAJL Nelinho Vitál.

Maria de Lourdes Xavier Lin
Media Officer
Gabinete Ministru Justisa

Advertisements