Partidu boot timoroan hadook Partidu Demokrátiku hosi koligasaun Governu nian

 

cnrtPartidu boot timoroan nian, Congresso Nacional de Reconstrução Timorense (CNRT), informa ona Partidu Demokrátiku (PD) – forsa polítiku boot datoluk – katak hadook ona partidu ne’e hosi koligasaun ne’ebé apoia Governu to’o 2017 no hela de’it Frente Mudansa.

Desizaun, ne’ebé fó sai hosi karta ba diresaun PD nian, no sei halo debate iha findesemana ne’e iha partidu, bele iha konsekuénsia lalais iha kompozisaun ezekutivu nian, ne’ebé iha pelumenus membru na’in lima ne’ebé pertense ba formasaun polítiku ne’e.

Hanesan kazu hosi ministru Kordenadór ba Asuntu Sosiál sira no ministru Edukasaun, António da Conceição, ministru Obras Públika, Transporte ho Telekomunikasaun nian Gastão de Sousa no hosi ministru Komérsiu, Indústria ho Ambiente, Constâncio Pinto.

Hanesan militante hosi PD maka visi-ministru Komérsiu, Nuno Pereira ho Sekretáriu Estadu hosi Administrasaun Estatal, Samuel Mendonça.

Hahú hosi eleisaun 2012, Governu timoroan hetan apoiu hosi koligasaun ida ho partidu tolu hosi forsa parlamentar haat: CNRT, PD ho FM, ho Fretilin (partidu boot daruak) apoia liña jerál sira hosi asaun governativiu, inklui programa hosi Governu no orsamentu.

Bloku Koligasaun, hahú tinan 2012, mosu hanesan Aliansa ida hosi Maioria Parlamentar (AMP) ne’ebé apoia Governu entre 2007 no 2012.

Dionísio Babo, sekretáriu-jerál CNRT nian, justifika iha karta ne’ebé haruka ba diresaun PD nian, ne’ebé Lusa hetan asesu, katak relasaun entre partidu rua ne’e hahú ladi’ak dezde antigu prezidente PD, Fernando La Sama de Araújo, nia mate.

Babo, ne’ebé hanesan mós ministru Estadu, Kordenadór hosi Asuntu Administrasaun Estadu no Justisa nian no mós ministru hosi Administrasaun Estatal, argumenta katak dirijente foun sira la respeita “kompromisu” hosi La Sama nian ho CNRT, kestiona deklarasaun sira no postura sira hosi PD, liuliu iha debate orsamentál sira no hafoin suspende hosi Prezidente Repúblika ba testu orsamentál nian.

Karta hatete katak pozisaun sira ne’ebé “la defende espíritu ka interese hosi koligasaun, situasaun ida ne’ebé aat ba nafatin, sustenta, hahú hosi diskursu polémiku ne’ebé xefe Estadu halo iha Parlamentu, iha fulan-Fevereiru nia rohan, marka ho krítika sira ba dirijente sira CNRT nian, Xanana Gusmão ho Fretilin nian, Mari Alkatiri.

Esplika katak situasaun ne’e analiza tiha ona iha reuniaun hosi Komisaun Polítiku Nasional (CPN) CNRT nian ne’ebé konsidera ona katak OD “la tuir ona kompromisu ne’ebé hetan iha ámbitu hosi Bloku Koligasaun nian”.

Polémiku ida ikus entre partidu sira mosu hafoin bankada sira hosi CNRT no hosi Fretilin defende tiha kriasaun ida komisaun eventuál hodi investiga deklarasaun sira hosi xefe Estadu, Taur Matan Ruak ne’ebé, ho aspetu sira seluk, hatete katak proximidade entre Xanana Gusmão no Mari Alkatiri ne’ebé akontese daudaun serve de’it hodi fó benefísiu ba família no belun sira.

Deputadu ida hosi PD, Virgílio da Costa Hornai, kestiona proposta ne’e hodi konsidera katak laiha justifikasaun tanba aleinde PR bele hetan imunidae nia mós bele, bainhira nia hakarak, ko’alia iha Parlamentu Nasional.

Bainhira husu atu komenta desizaun ne’e, dirijente ida hosi PD hatete ba Lusa katak asuntu ne’e sei debate iha findesemana ne’e iha partidu, maibé nia rejeita krítika sira hosi CNRT no subliña katak “koligasaun ida la signifika atu ema hotu tenki konkorda malu”.

“Ida-idak iha nia pozisaun no bele aprezenta. Maibé, iha fundamentál, maka husu nafatin votu ida, ba programa ka orsamentu, ami hala’o. Ami hala’o nafatin”, hatete hosi dirijente ne’e.

“Ami konsidera katak akuzasaun sira ne’e laiha fundamentu”, nia hatete.

Maski aspetu ne’e la refere iha karta hosi CNRT, dirijente sira hosi partidu ne’ebé ko’alia ho Lusa admiti katak iha deskontentamentu tanba sira konsidera katak proximidade entre PD ho Prezidente Repúblika, liuliu ho Partidu Libertasaun Popular (PLP), forsa polítiku ne’ebé sei apoia kandidatura ruma hosi Taur Matan Ruak nian iha eleisaun lejislativu sira.

Akuzasaun ida ne’ebé rejeita hosi dirijente PD nian, ne’ebé garanti katak “laiha kontaktu ruma entre PD ho PLP”, no katak relasaun ho xefe Estadu hanesan institusional no akontese hanesan ho bankada sira.

“Ami nia pozisaun iha parlamentu la’ós defende Prezidente. Ami hatete de’it katak buat ne’ebé maka akontese daudaun hanesan problema ida ne’ebé envolve veteranu luta na’in rua no tenki rezolve liuhosi diálogu”, nia hatete.

“Sira hadook ami tanba motivu seluk. Tanba de’it ami la defende prezidente CNRT nian”, nia hatutan.

SAPO TL ho Lusa

Advertisements